ສະພາບການພະຍາດໄຂ້ຍຸງລາຍໃນປະເທດເຮົາ ປັດຈຸບັນ, ຍັງຕ້ອງໄດ້ມີການເຝົ້າລະວັງ ແລະ ຕິດຕາມຢ່າງໃກ້ຊິດ ເນື່ອງຈາກວ່າຍອດຜູ້ປ່ວຍໄຂ້ຍຸງລາຍຍັງມີອັດຕາເພີ່ມຂຶ້ນໃນແຕ່ລະວັນ. ທົ່ວປະເທດມີພຽງແຂວງຊຽງຂວາງທີ່ບໍ່ມີລາຍງານຜູ້ປ່ວຍໄຂ້ຍຸງລາຍ ສ່ວນນະຄອນຫຼວງວຽງຈັນແມ່ນມີຜູ້ປ່ວຍສູງເຖິງ 499 ຄົນ.
ລາຍງານການເຝົ້າລະວັງພະຍາດໄຂ້ຍຸງລາຍປະຈໍາ ວັນທີ 28/06/2020 ມີ 06 ກໍລະນີ ແລະ ເສຍຊີວິດ 00 ກໍລະນີ. ກໍລະນີສະສົມທັງໝົດແຕ່ວັນທີ 28/12/2019-28/06/2020 ມີ 2,223 ກໍລະນີ ແລະ ເສຍຊີວິດ 06 ກໍລະນີ.
ໃນນີ້ ນະຄອນຫຼວງວຽງຈັນ ຍັງຄອງອັນດັບສູງສຸດ ມີຄົນຕິດເຊື້ອພະຍາດນີ້ສະສົມ 499 ກໍລະນີ, ເສຍຊີວິດ 2 ຄົນ; ແຂວງວຽງຈັນ 305 ກໍລະນີ; ອັດຕະປື 230 ກໍລະນີ; ບໍລິຄຳໄຊ 257 ກໍລະນີ, ເສຍຊີວິດ 2 ຄົນ; ຄຳມ່ວນ 178 ກໍລະນີ, ເສຍຊີວິດ 1 ຄົນ; ສະຫວັນນະເຂດ 175 ກໍລະນີ; ສາລະວັນ 136 ກໍລະນີ; ໄຊຍະບູລີ 116 ກໍລະນີ, ເສຍຊີວິດ 1 ຄົນ; ເຊກອງ 51 ກໍລະນີ, ຫຼວງນໍ້າທາ 71 ກໍລະນີ; ໄຊສົມບູນ 36 ກໍລະນີ; ອຸດົມໄຊ 46 ກໍລະນີ; ຫຼວງພະບາງ 55 ກໍລະນີ; ບໍ່ແກ້ວ 46 ກໍລະນີ; ຈຳປາສັກ 17 ກໍລະນີ; ຜົ້ງສາລີ 5 ກໍລະນີ; ຫົວພັນ 1 ກໍລະນີ; ສ່ວນແຂວງຊຽງຂວາງ ບໍ່ພົບກໍລະນີຕິດເຊື້ອພະຍາດນີ້.
ສະພາບໄຂ້ຍຸງລາຍປີຜ່ານມາ ຖືເປັນປີລະບາດໃຫຍ່ຢູ່ຂົງເຂດອາຊີຕາເວັນອອກສ່ຽງໃຕ້ ເຊິ່ງມີຜູ້ຕິດເຊື້ອ 39.000 ຄົນ ເສຍຊີວິດ 76 ຄົນ. ສະເພາະຢູ່ ສປປ ລາວ ໄດ້ມີການແຜ່ລະບາດຢ່າງກວ້າງຂວາງໃນທົ່ວປະເທດ.
ເພື່ອປ້ອງກັນພະຍາດໄຂ້ຍຸງລາຍບໍ່ໃຫ້ມີການລະບາດເປັນວົງກວ້າງ ແລະ ບໍ່ໃຫ້ມີກໍລະນີໃໝ່ ທຸກຄົນຕ້ອງພ້ອມກັນປ້ອງກັນບໍ່ໃຫ້ຍຸງລາຍກັດ ໄປຄຽງຄູ່ກັບການປະຕິບັດຫຼັກການ 5 ປ ທີ່ກະຊວງ ສາທາລະນະສຸກ ວາງອອກເປັນປະຈຳ ໂດຍສະເພາະທຳລາຍແຫຼ່ງເພາະພັນໜອນນໍ້າຍຸງລາຍ ບໍ່ມີໜອນນໍ້າ ກໍຈະບໍ່ມີຍຸງລາຍ.