ກອງປະຊຸມກະກຽມເນື້ອໃນລະດັບເຈົ້າໜ້າທີ່ອາວຸໂສສາທາລະນະສຸກອາຊຽນໃຫ້ແກ່ກອງປະຊຸມ ລັດຖະມົນຕີສາທາລະນະສຸກອາຊຽນ ຄັ້ງທີ 16 ທີ່ສປປ ລາວ ເປັນເຈົ້າພາບ ຈັດຂຶ້ນວັນທີ 5-6 ສິງຫາ 2024 ທີ່ຫໍປະຊຸມແຫ່ງຊາດ ໂດຍເປັນປະທານຂອງ ທ່ານ ດຣ.ນ.ອາພອນ ວິຊາເທບ ຫົວໜ້າຫ້ອງການ ກະຊວງສາທາລະນະສຸກ. ມີຜູ້ຕາງໜ້າຈາກບັນດາປະເທດສະມາຊິກອາຊຽນ ແລະ ພາກສ່ວນກ່ຽວຂ້ອງເຂົ້າຮ່ວມ. ກອງປະຊຸມຄັ້ງນີ້ໄດ້ປຶກສາຫາລື ປະກອບຄຳຄິດເຫັນ ແລະ ຮັບຮອງເອົາບັນດາເອກະສານສໍາຄັນທີ່ຈະປະກອບເຂົ້າໄປຮັບຮອງໃນກອງປະຊຸມລັດຖະມົນຕີສາທາລະນະສຸກອາຊຽນຄັ້ງທີ16 ພ້ອມນີ້ຍັງມີກອງປະຊຸມທີ່ປິ່ນອ້ອມໃນວຽກງານສາທາລະນະສຸກທີ່ກ່ຽວຂ້ອງອື່ນໆຄື: ກອງປະຊຸມຄັ້ງທີ 16th ASEAN Health Ministers Meeting ກອງປະຊຸມຄັ້ງທີ 10th ASEAN Plus Three Health Ministers Meeting ກອງປະຊຸມຄັ້ງທີ 9th ASEAN China Health Ministers Meeting ກອງປະຊຸມຄັ້ງທີ 2nd ASEAN – ROK Health Ministers Meeting ກອງປະຊຸມ ASEAN-U.S Special Session Health Ministerial Meeting ກອງປະຊຸມ Follow-up 2 nd ASEAN Finance and Health Ministerial Meeting. ໃນກອງປະຊຸມ ທ່ານ ດຣ.ນ.ອາພອນ ວິຊາເທບ ຫົວໜ້າຫ້ອງການ ກະຊວງສາທາລະນະສຸກ. ຍັງໄດ້ເນັ້ນໜັກໃສ່ວຽກງານກຸ່ມສຸຂະພາບທີ1 ຄື: ການສົ່ງເສີມການດຳລົງຊີວິດເພື່ອສຸຂະພາບທີ່ດີ ກຸ່ມສຸຂະພາບທີ2 ການໂຕ້ຕອບໄພອັນຕະລາຍ ແລະ ໄພຄຸກຄາມທີ່ເກີດຂື້ນໃໝ່ ກຸ່ມສຸຂະພາບທີ3 ການສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກແລະ ການເຂົ້າເຖິງການເບິ່ງແຍງສຸຂະພາບ ແລະ ກຸ່ມສຸຂະພາບທີ4 ການຮັບປະກັນຄວາມປອດໄພດ້ານອາຫານ ເພື່ອແນໃສ່ສ້າງຄວາມເຂັ້ມແຂງດ້ານລະບົບສາທາລະນະສຸກ ແລະ ຍົກສູງວຽກງານດັ່ງກ່າວໃນປະຊາຄົມອາຊຽນໃຫ້ເຂັ້ມແຂງຍິ່ງຂຶ້ນ.
