ເກືອບເດືອນແລ້ວທີ່ລາວບໍ່ພົບຜູ້ຕິດໂຄວິດ

ປະຈຸບັນຄົນເຈັບທີ່ຕິດເຊື້ອພະຍາດໂຄວິດ19 ຢູ່ ສປປ ລາວ ຈໍານວນ19ຄົນ ປິ່ນປົວດີແລ້ວ 13ຄົນ ແລະພວມຕິດຕາມອາການຢູ່ໂຮງໝໍພຽງແຕ່ 6ຄົນເທົ່ານັ້ນ, ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມໂຄວິດ 19 ຖະແຫລງຕໍ່ສື່ມວນຊົນ ໃນຕອນບ່າຍວັນທີ 11 ພຶດສະພາ2020 ນີ້ເຖິງສະພາບການຄວບຄຸມພະຍາດໂຄວິດ19 ຢູ່ ສປປ ລາວ ວ່າ: ການເຝົ້າລະວັງ ແລະ ວິເຄາະ ໄດ້ເກັບຕົວຢ່າງມາກວດທັງໝົດ 360 ຄົນ, ໃນນັ້ນ ມີກໍລະນີສົງໄສ 16 ຄົນ, ແຮງງານລາວທີ່ກັບມາຈາກປະເທດໄທ 299 ຄົນ ແລະ ແຮງງານໄທທີ່ເຂົ້າມາແປງສາຍໄຟຟ້າຢູ່ແຂວງໄຊຍະບູລີ 45 ຄົນ. ຜົນກວດທັງໝົຂອງແຮງງານລາວ, ແຮງງານໄທ ທີ່ເຂົ້າມາ ແລະ ກໍລະນີສົງໄສຂອງມື້ວານນີ້ ບໍ່ພົບເຊື້ອ ໝາຍຄວາມວ່າໃນວັນທີ 10 ພຶດສະພາ 2020 ບໍ່ມີຜູ້ຕິດເຊື້ອໃໝ່.

ປະຈຸບັນຍັງມີຜູ້ນອນຕິດຕາມຢູ່ໂຮງໝໍມິດຕະພາບ 6 ຄົນ ລວມທັງກໍລະນີ ທີ14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ, ທັງໝົດເຫັນວ່າມີອາການເບົາບາງ ແລະ ສືບຕໍ່ຕິດຕາມອາການ ແລະ ກວດວິເຄາະຊອກຫາເຊື້ອອີກໃນໜື່ງອາທິດຕໍ່ໜ້າ.
ຮສ ດຣ ພູທອນ ເມືອງປາກໃຫ້ຮູ້ອີກວ່າ: ວັນທີ 11 ພຶດສະພາ 2020 ກອງເລຂາຄະນະສະເພາະກິດພວກເຮົາ ໄດ້ລົງໄປຢ້ຽມຢາມສູນຈຳກັດບໍລິເວນນະຄອນຫຼວງວຽງຈັນ ຢູ່ສູນຝຶກອົບຮົມຂອງກອງທັບຫຼັກ 27 ເຊິ່ງປະຈຸບັນມີ ຜູ້ພັກຢູ່ສູນຈຳນວນ 374 ຄົນ, ຍິງ 127 ຄົນ ເຊິ່ງມີຖິ່ນຖານມາຈາກຕ່າງແຂວງ, ເຫັນວ່າສູນແມ່ນມີມາດຕະຖານດີສົມຄວນ ທາງດ້ານທີ່ພັກເຊົາ, ເປັນເຂດຈຳກັດບໍລິເວນສະເພາະ, ມີຄວາມປອດໄພສູງ, ບັນດາແຮງງານເຫຼົ່ານີ້ ພາຍຫຼັງກວດວິເຄາະບໍ່ພົບເຊື້ອແລ້ວ ຈຳນວນໜຶ່ງ ຈະໄດ້ເດີນທາງກັບຄືນໄປແຂວງຂອງຕົນ ຈຳນວນໜຶ່ງກໍ່ຈະໄດ້ສືບຕໍ່ຈຳກັດບໍລິເວນຢູ່ນີ້ຈົນຄົບ 14 ວັນ ເຊິ່ງມີຄວາມຫຍຸ້ງຍາກກ່ຽວກັບ ອາຫານການກິນ ແລະ ສິ່ງອຳນວຍຄວາມສະດວກຕ່າງໆ. ໂອກາດນີ້ຈຶ່ງແຈ້ງຂ່າວມາເຖິງ ຜູ້ໃຈບຸນທັງຫຼາຍ ຂໍເຊີນຊວນບັນດາທ່ານ ໄປບໍລິຈາກ ນ້ຳດື່ມ, ອາຫານ ແລະ ເຄື່ອງໃຊ້ທີ່ຈຳເປັນ ຕາມອັດທະຍາໄສ ໂດຍໃຫ້ປະສານງານກັບຄະນະສະເພາະກິດນະຄອນຫຼວງໂດຍກົງ.

ຮອດວັນທີ 11 ພຶດສະພາ ທົ່ວໂລກມີຜູ້ຕິດເຊື້ອທັງໝົດ: 4.175.055 ຄົນ, ເພີ່ມຂຶ້ນຈາກມື້ວານນີ້ 76.119 ຄົນ, ເສຍຊີວິດ 283.575 ຄົນ, ປົວດີ 1.435.209 ຄົນ.
ອາເມຣິກາ ມີຜູ້ຕິດເຊື້ອຫລາຍອັນດັບໜຶ່ງຂອງໂລກ ຄື : 1.362.559 ຄົນ. ຮອງລົງມາແມ່ນແອັສປາຍ ມີຜູ້ຕິດເຊື້ອ: 264.663ຄົນ, ແລະອີຕາລີ ມີຜູ້ຕິດເຊື້ອ 219.070ຄົນ.
ສ່ວນປະເທດສະມາຊິກອາຊຽນອັນດັບໜຶ່ງແມ່ນສິງກະໂປ 23.336 ຄົນ, ອິນໂດເນເຊຍ 13.645 ຄົນ, ຟິລິປິນ 10.610 ຄົນ, ມາເລເຊຍ 6.589 ຄົນ, ໄທ 3.009 ຄົນ, ຫວຽດນາມ 288 ຄົນ, ມຽນມາ 178 ຄົນ, ບຣູໄນ 141 ຄົນ, ກຳປູເຈຍ 122 ຄົນ, ສ່ວນ ສປປ ລາວ ມີຜູ້ຕິດເຊື້ອຕໍ່າກວ່າໝູ່ໃນອາຊຽນ ຄື 19ຄົນ.