ທ່ານ ທອງລຸນ ສີສຸລິດ, ເລຂາທິການໃຫ່ຍ, ປະທານປະເທດ ໄດ້ ຢ້ຽມຢາມ ແລະ ພົບປະໂອ້ລົມ ພະນັກງານຫຼັກແຫຼ່ງ ຂະແໜງສາທາລະນະສຸກ. ພາຍໃຕ້ການນຳພາຕ້ອນຮັບ ໂດຍ ທ່ານ ປອ.ດຣ.ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ມີບັນດາຄະນະກົມ, ຫ້ອງການ, ອຳນວຍການໂຮງໝໍ, ແພດໝໍ, ພະຍາບານ ແລະ ພະນັກງານຫຼັກແຫຼ່ງອ້ອມຂ້າງກະຊວງສາທາລະນະສຸກເຂົ້າຮ່ວມ, ໃນຕອນເຊົ້າວັນທີ 22 ສິງຫາ 2024 ທີ່ໂຮງໝໍມະໂຫສົດ. ໂອກາດທີ່ມີຄວາມໝາຍຄວາມສຳຄັນນີ້ ທ່ານ ປອ.ດຣ.ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ກໍ່ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານສາທາລະນະສຸກ ຜ່ານມາ ໂດຍສະເພາະ ການສຸມໃສ່ໃນການຜັນຂະຫຍາຍຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025). ຂະແໜງສາທາລະນະສຸກພວກເຮົາກໍາລັງສຸມໃສ່ຈັດຕັ້ງປະຕິບັດ ແຜນພັດທະນາສາທາລະນະສຸກ ປະຈໍາປີ 2024 ທີ່ເປັນການຜັນຂະຫຍາຍ ມະຕິກອງປະຊຸມໃຫຍ່ຂອງອົງຄະນະພັກກະຊວງ ສາທາລະນະສຸກ ສະໄໝທີ IX ກໍ່ຄືແຜນພັດທະນາສາທາລະນະສຸກ 5 ປີ ຄັ້ງທີ IX (2021-2025) ແລະ ຍຸດທະ ສາດປະຕິຮູບສາທາລະນະສຸກ ໄລຍະ III ທີ່ໄດ້ຜັນຂະຫຍາຍມະຕິກອງປະຊຸມໃຫ່ຍຂອງພັກ ມາເປັນແຜນງານ, ໂຄງການລະອຽດ ໃນຂະແໜງສາທາລະນະສຸກພວກເຮົາ ໂດຍເລັ່ງໃສ່ການປັບປຸງຄຸນນະພາບການ ບໍລິການສາທາລະນະສຸກ ແລະ ການບັນລຸຄາດໝາຍ ຕົວຊີ້ບອກຕ່າງໆ ຂອງບັນດາ 7 ແຜນງານ ລວມທັງ 11 ຕົວຊີ້ບອກທີ່ສະພາແຫ່ງຊາດໄດ້ຮັບຮອງ. ຄຽງຄູ່ກັນນີ້, ການກະກຽມ ແລະ ການດໍາເນີນ ກອງປະຊຸມໃຫຍ່ 3ຂັ້ນ ສະໄໝທີ IX ຂອງອົງຄະນະພັກ ກະຊວງສາທາລະນະສຸກ ໄດ້ສຳເລັດກອງປະຊຸມໃຫຍ່ 34 ຮາກຖານພັກ ແລະ 2 ຄະນະພັກຮາກຖານ ຂອງຈຳນວນ ທັງໝົດ 91ຮາກຖານພັກ ແລະ 6ຄະນະພັກຮາກຖານ, ຊຶ່ງຄາດຄະເນ ຈະສໍາເລັດທຸກໜ່ວຍ ພັກ ແລະ ຄະນະພັກ ຮາກຖານ ໃນທ້າຍປີ 2024 ແລະ ກອງປະຊຸມໃຫຍ່ຄັ້ງທີ X ຂອງອົງຄະນະພັກ ກະ ຊວງຈະສາມາດຈັດຂຶ້ນ ພາຍໃນ 6 ເດືອນຕົ້ນປີ 2025 ຕາມແຜນ.ໃນການຢ້ຽມຢາມໃນຄັ້ງນີ້ ທ່ານ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ກໍ່ໄດ້ເໜັ້ນໜັກໃຫ້ຂະແໜງສາທາລະນະສຸກໃຫ້ມີຈຸດສຸມດັ່ງຕໍ່ໄປນີ້:
– ໃຫ້ເອົາໃຈໃສ່ວຽກງານ 5 ດີ 1 ພໍໃຈ ໃຫ້ບັນລຸໄດ້ ໂດຍສະເພາະແມ່ນການປະຕິບັດ 5 ດີ ເພື່ອໃຫ້ໄດ້ 1 ພໍໃຈ
– ໃຫ້ຮັກສານາມມະຍົດຂອງນັກຮົບເສື້ອຂາວເພື່ອກຽມພ້ອມຮັບມືກັບເຫດການອື່ນໆທີ່ຈະເກີດຂຶ້ນໂດຍສະເພາະແມ່ນການລະບາດຂອງພະຍາດ
– ເອົາໃຈໃສ່ວຽກງານໂຄສະນາສຸຂະສຶກສາໃນການຮັກສາສຸຂະພາບໃຫ້ມີຄວາມຕໍ່ເນື່ອງ ກວ້າງຂວາງ ແລະ ເຂົ້າເຖິງປະຊາຊົນໃຫ້ຫຼາຍຂຶ້ນ ໂດຍການນຳໃຊ້ສື່ອອນລາຍເຂົ້າມາຊ່ວຍ
– ສືບຕໍ່ປັບປຸງກອງທຶນສຸຂະພາບໃຫ້ດີຂຶ້ນພ້ອມທັງປັບປຸງຕາໜ່າງສາທາລະນະສຸກ ໃຫ້ທົ່ວເຖິງ
– ຍົກສູງຄຸນນະພາບຂອງໂຮງໝໍເທື່ອລະກ້າວໃຫ້ມີຄວາມທັນສະໄໝນຳໃຊ້ລະບົບໄອທິເຂົ້າຊ່ວຍ ແລະ ຫັນເປັນກຸ້ມຕົນເອງ
– ສົມທົບຢາຫຼວງ ແລະ ຢາພື້ນເມືອງໃຫ້ສາມາດນຳໃຊ້ຮ່ວມກັນໄດ້ຢູ່ບັນດາໂຮງໝໍ
– ເອົາໃຈໃສ່ປັບປຸງຄຸນນະພາບຂອງໂຮງງານຜະລິດຢາຂອງລັດໃຫ້ມີມາດຕະຖານສາກົນ ໂດຍສະເພາະແມ່ນຜ່ານມາດຕະຖານຂອງ ອຢ
– ເອົາໃຈໃສ່ວຽກງານປັບປຸງວຽກງານອາຫານ ແລະ ຢາ ໃຫ້ສາມາດກວດສອບ ແລະ ປ້ອງກັນບໍ່ໃຫ້ມີຢາຕົກມາດຕະຖານ ແລະ ອື່ນໆ
– ເອົາໃຈໃສ່ປັບປຸງບັນດາໂຮງໝໍເອກະຊົນໃຫ້ມີຄຸນນະພາບ ແລະ ມີລາຄາທີ່ສົມເຫດສົມຜົນ ປະຊາຊົນສາມາດເຂົ້າເຖິງໄດ້
– ສືບຕໍ່ເປັນເຈົ້າການຮ່ວມມືກັບຄູ່ຮ່ວມພັດທະນາ ໂດຍສະເພາະອົງການຈັດຕັ້ງສາກົນ ໃຫ້ສາມາດຮັບມືກັບບັນຫາຕ່າງໆ ທີ່ອາດຈະເກີດຂຶ້ນໃນຕໍ່ໜ້າ.
