ປັດຈຸບັນ ສປປ ລາວ ຍັງບໍ່ພົບຜູ້ຕິດເຊື້ອໂຄວິດ-19 ເພີ່ມຂຶ້ນໃໝ່, ຕົວເລກ ຜູ້ຕິດເຊື້ອສະສົມ ຍັງຢູ່ 45 ຄົນ, ປິ່ນປົວຫາຍດີ 41 ຄົນ, ຍັງສືບຕໍ່ ນອນຕິດຕາມອາການ ແລະ ປິ່ນປົວຢູ່ໂຮງໝໍ 4 ຄົນ, ເຖິງຢ່າງໃດກໍ່ຕາມເຖິງແມ່ນວ່າ ສປປ ລາວ ຈະບໍ່ມີຜູ້ຕິດເຊື້ອເ ພີ່ມຂຶ້ນໃໝ່ກໍ່ຕາມ ຄະນະສະເພະກິດ ກໍ່ຄື ກະຊວງສາທາລະນະສຸກ ກໍບໍ່ໄດ້ລະເຫລິງ ໄດ້ເອົາໃຈໃສ່ເຝົ້າລະວັງຕິດຕາມກວດກາ ຄົນເຂົ້າ-ອອກເມືອງ ຢ່າງເຄັ່ງຄັດ ຢູ່ບັນດາດ່ານ ເຂົ້າ-ອອກຕ່າງໆ ໃນຂອບເຂດທົ່ວປະເທດ.
ທ່ານ ດຣ. ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະ ນະສຸກ ລາຍງານໃຫ້ຮູ້ໃນວັນທີ 10 ກຸມພາ 2021 ນີ້ວ່າ: ນັບແຕ່ ເດືອນມັງກອນ 2020 ຮອດປັດຈຸບັນ ໄດ້ເກັບຕົວຢ່າງມາກວດທັງໝົດ 107.013 ຕົວຢ່າງ, ກວດພົບເຊື້ອສະສົມ 45 ຄົນ ສະເພາະ ວັນທີ 9 ກຸມພາ 2021, ໄດ້ເກັບຕົວຢ່າງມາກວດວິເຄາະທັງໝົດ 291 ຄົນ, ຜົນກວດວິເຄາະທັງໝົດແມ່ນບໍ່ພົບເຊື້ອ. ໃນຂະນະທີ່ ຢູ່ບັນດາກຸ່ມປະເທດອາຊຽນ ແມ່ນມີການແຜ່ລະບາດຢ່າງຕໍ່ເນື່ອງ ໂດຍສະເພາະ ຢູ່ປະເທດ ອິນໂດເນເຊຍ ແມ່ນມີຜູ້ຕິດເຊື້ອສະສົມສູງກວ່າໝູ່, ຖັດລົງມາແມ່ນປະເທດ ຟີລິບປິນ, ມາເລເຊຍ, ມຽນມາ ຕາມລຳດັບ.
ຕໍ່ການແຜ່ລະບາດຢ່າງຕໍ່ເນື່ອງ ຢູ່ບັນດາປະເທດອາຊຽນ, ສປປ ລາວ ກໍຄື ຄະນະສະເພາະກິດ ກໍໄດ້ເອົາໃຈໃສ່ເຝົ້າລະວັງຕິດຕາມກວດກາ ຄົນເຂົ້າ-ອອກເມືອງ ຢ່າງເຄັ່ງຄັດຢູ່ບັນດາດ່ານຕ່າງໆ ໃນທົ່ວປະເທດ, ເຊິ່ງໃນວັນທີ 9 ກຸມພາ ທົ່ວປະເທດມີຜູ້ເດີນທາງເຂົ້າມາມີທັງໝົດ 2.284 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ, ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດແລ້ວ ຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ ຈົນກວ່າຈະຄົບກຳນົດ 14 ວັນ.
ທ່ານ ດຣ. ນາງ ລັດສະໝີ ວົງຄຳຊາວ ຍັງຮຽກຮ້ອງໃຫ້ປະຊາຊົນລາວບັນດາເຜົ່າ ຍົກສູງສະຕິຄວາມຮັບຜິດຊອບ ປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດ ເປັນຕົ້ນແມ່ນ ສວມໃສ່ຜ້າອັດປາກ-ດັງ, ກິນບ່ວງຮ້ອນຊ້ອນກາງ, ບໍ່ໃຊ້ຈອກນ້ຳຮ່ວມກັນ, ໝັ່ນລ້າງມືເລື້ອຍໆດ້ວຍນ້ຳສະອາດໃສ່ສະບູ ຫລື ເຈວລ້າງມືຂ້າເຊື້ອ, ຖ້າຫາກທ່ານຮູ້ສຶກບໍ່ສະບາຍ ໃຫ້ໄປພົບແພດທັນທີ ເພື່ອຮັບການປິ່ນປົວຢ່າງທັນການ ເພື່ອປ້ອງກັນ ແລະ ຄວບຄຸມ ສະພາບການລະບາດ ໃນປະເທດເຮົາບໍ່ໃຫ້ເກີດມີການຕິດເຊື້ອໃນປະເທດຮອບໃໝ່ ຄືກັບຫລາຍປະເທດໃນໂລກ ແລະ ປະເທດໃກ້ຄຽງ ສປປ ລາວ.