ຂ່າວ

  • 20 ມ.ນ

 

ເພື່ອຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ່ x ຂອງພັກ ຊຶ່ງຖືເອົາການບໍລິການປິ່ນປົວທີ່ມີຄຸນນະພາບຢ່າງທົ່ວເຖີງ ແລະ ເປັນທຳຂອງວຽກງານຕົ້ນຕໍ ເພື່ອສູ້ຊົນ 5 ຕົວຂີ້ວັດທີ່ບໍທັນປະສົບຜົນສຳເລັດ ຊຶ່ງນຶ່ງໃນຕົວຊີ້ວັດເລົ່ານີ້

 

 

 ແມ່ນຫລຸດຜ່ອນອັດຕາການຕາຍຂອງແມ່ເດັກເກີດໃໝ່ທີ່ຍັງສູງໃຫ້ປະສົບຜົນສຳ ເລັດ, ດັ່ງນັ້ນໂຮງໝໍແມ່ ແລະ ເດັກເກີດໃໝ່ຈຶ່ງໄດ້ຈັດຊຸດອົບຮົມທົບທວນຄຶນກ່ຽວກັບການເບີ່ງແຍງເດັກ ເກີດໃໝ່ຂື້ນ

 

 

ໃນຕອນເຊົ້າຂອງວັນທີ 18 ມີນາ 2019 ນີ້ ໂດຍການເປັນປະທານຂອງ ດຣ.ສີວັນໄຊ ວົງ ສັກ ຮອງຜູ້ອຳນວຍການໂຮງໝໍແມ່ ແລະ ເດັກເກີດໃໝ່,ພ້ອມດ້ວຍທ່ານ ຮສ,ດຣ. ຄຳເປ ພົງສະຫວັດປະທານສະມາຄົມແພດເດັກລາວ,ດຣ.ມາຣີອອນ ມົນກອບ ຮອງປະທານອົງການຮ່ວມມືໂຮງໝໍລາວ - ສະວິດ ພ້ອມດ້ວຍທິມງານ,ດຣ. ພົມມະດີ ເວດຊະວົງ ຫົວໜ້າພະແນກເດັກເກີດໃໝ່ ແລະ ນັກສຳມະນາກອນເຂົ້າຮ່ວມ ຊຶ່ງມາຈາກ 4 ໂຮງໝໍສູນກາງ ແລະ 10 ໂຮງໝໍແຂວງ ມີ 3 ແຂວງ ພາກກາງ,3 ແຂວງ ພາກໃຕ້ ແລະ 4 ແຂວງ ພາກເໜືອ. ຈຸດປະສົງ ກໍ່ເພື່ອສ້າງເຄືອຂ່າຍ ແລະ ເຮັດໃຫ້ການຮ່ວມມື ນຳບັຍດາໂຮງໝໍທົ່ວປະເທດ ໂດຍເນັ້ນໃສ່ແລກປ່ຽນບົດຮຽນຈາກອົງການສາກົນໂດຍມີທິມງານຂອງອົງການຮ່ວມມື ລາວ-ສະວິດ ມາໃຫ້ຄວາມຮູ້ແກ່ບັນດານັກສຳມະນາກອນ,ເພື່ອສ້າງຄວາມເຂັ້ມແຂງທາງດ້ານການພັດທະນາຄວາມສາມາດທີ່ຈະນຳໃຊ້ເຂົ້າໃນວຽກງານຕົວຈິງ,ຊຶ່ງທ່ານ ຮສ ດຣ.ຄຳເປ ພົງສະຫວັດ ໄດ້ເນັ້ນໜັກໃສ່ໃຫ້ທຸກຄົນມີສ່ວນຮ່ວມໃນການສຸມສະຕິປັນຍາ ຍາດແຍ່ງເອົາຄວາມຮູ້ ແລະ ສູ້ຊົນ ໃຫ້ໄດ້,ເພື່ອລຸດຜ່ອນການຕາຍໃນເດັກເກີດໃໝ່ແຕ່ນີ້ຮອດປີ 2020. ພ້ອມນີ້ທາງອົງການຮ່ວມມືລາວ-ສະວິດ ຍັງໄດ້ສະໜັບສະໜູນເຄື່ອງແມກຄ່າບິລິຣູບິນ ໃນເລືອດ ໃນເດັກເກີດໃໝ່ ໃຫ້ບັນດາໂຮງໝໍທີ່ເຂົ້າຮ່ວມອົບຮົມ ແລະ ທັງເປັນຜູ້ໃຫ້ການສະໜັບສະໜູນຈັດຊຸດອົບຮົມໃນຄັ້ງນີ້ດ້ວຍ.

  • 26 ກ.ຍ

 

ຕອບຮັບ​ຕາມ​ຄຳ​ເຊີນ​ຂອງ​ທ່ານ​ລັດຖະມົນຕີ ກະຊວງ​ສາທາລະນະ​ສຸກ ສາທາລະນະ​ລັດ​ປະຊາ​ທິປະ​ໄຕ ປະຊາຊົນ​ລາວ, ຄະນະ​ຜູ້​ແທນ ກະຊວງ​ສາທາລະນະ​ສຸກ ​ແຫ່ງ ສ.ສ ຫວຽດນາມ ພ້ອມ​ດ້ວຍ​ຄະນະ 08 ທ່ານ ນຳ​ໂດຍ ທ່ານ ຮສ ດຣ ຟາ​ມ​ເລ​ຕວນ ຮອງລັດຖະມົນຕີ​ກະຊວງສາທາລະນະ​ສຸກ.

 

 

ສສ ຫວຽກ​ນາມໄດ້​ເດີນທາງ​ມາ​ເຖີງນະຄອນຫຼວງ​ວຽງ​ຈັນ ​ເພື່ອ​ເຂົ້າ​ພົບ​ປະ​ກັບ​ທ່ານ ຄຳ​ພອນ ພຸດ​ທະ​ວົງ ​ເລຂາ​ຄະນະ​ພັກ, ຮອງ​ລັດຖະມົນຕີ​ກະຊວງ​ສາທາລະນະ​ສຸກ, ​ເປົ້າ​ໝາຍ​ຂອງ​ການ​ເຊື້ອ​ເຊີນ​ແມ່ນ​ເພື່ອ​ເພີ້​ມທະວີ​ສາຍ​ພົວພັນ​ຮ່ວມ​ມື​ພິ​​ເສດ​ຂອງ​ສອງ​ຊາດ ກໍ່​ຄື​ສອງ​ຂະ​ແໜງ​ສາທາລະນະ​ສຸກ ​ເຊີ່ງ​ແລກປ່ຽນ​ບົດຮຽນ​ເຊີ່ງ​ກັນ ​ແລະ ກັນ, ​ເຊີ່ງ​ທັງ​ສອງ​ຝ່າຍ​ໄດ້​ພົບ​ປະກັນ​ທາງ​ດ້ານ​ວິຊາ​ການ​ໂດຍ​ຝ່າຍ​ລາວ​ໄດ້​ນຳ​ສະ​ເໜີ​ແລກປ່ຽນ​ບົດຮຽນ​ການຈັດ​ຕັ້ງ​ປະຕິບັດ​ວຽກ​ງານ​ການ​ເງິນ​ສາທາລະນະ​ສຸກ, ວຽກ​ງານປີ່​ນປົວ​ສຸຂະພາບ, ວຽກ​ງານ​ປະກັນ​ສຸຂະພາບ ​ແລະ ວຽກ​ງານ​ຄຸ້ມຄອງ​ການ​ເງິນ​ຂອງ​ສະຖານ​ທີ່​ບໍລິ​ການປີ່​ນປົວ, ​​ເຊິ່ງໃນ​ວັນ​ທີ 25/ 09 / 2018 ຜ່ານ​ມາ​ໄດ້​ເປີດ​ກອງ​ປະຊຸມ​ຂື້ນ​ຢູ່ ​ໂຮງ​ແຮມ​ເມືອງ​ແທ໋ງ, ​ໂດຍ​ຝ່າຍ ສ.ສ ຫວຽດນາມ ​ໄດ້​ນຳ​ສະ​ເໜີ​ບົດຮຽນ,​ ປະສົບ​ການຈັດ​ຕັ້ງ​ປະຕິບັດ​ວຽກ​ງານ​ການ​ເງິນ​ສາທາລະນະ​ສຸກ, ປີ່​ນປົວ, ປະກັນ​ສຸຂະພາບ ​ແລະ ການ​ຫັນ​ໂຮງໝໍ​ລັດ​ຢູ່ ສ.ສ ຫວຽດນາມ ​ເພື່ອ​ກຸ້ມ​ຕົນ​ເອງ​ທາງ​ດ້ານ​ການ​ເງິນ ​ໂດຍ​ມີ​ຜູ້​ເຂົ້າ​ຮ່ວມ​ຈາກ ຫ້ອງ​ການ, ກົມ, ​ໂຮງໝໍ​ສູນ​ກາງ, ອ້ອມ​ຂ້າງ​ກະຊວງ​ສາທາລະນະ​ສຸກ, ກົມ​ກ່ຽວຂ້ອງ​ຂອງ​ຂະ​ແໜງ​ສາທາລະນະ​ສຸກ​ອ້ອມ​ຂ້າງ​ສູນ​ກາງ, ພະ​ແນ​ກສາທາລະນະ​ສຸກ​​ແຂວງ, ​ໂຮງໝໍ​ແຂວງ​ໃນ​ທົ່ວ​ປະ​ເທດ​ເຂົ້າ​ຮ່ວມ, ຈຸດປະສົງ​ຂອງ​ກອງ​ປະຊຸມ​ຄັ້ງ​ນີ້​ແມ່ນຝ່າ​ຍລາວ​ພວກ​ເຮົາຈະ​ໄດ້ຮຽນ​ຮູ້, ຖອດ​ຖອນ​ບົດຮຽນ​ທີ່​ດີ​ຂອງ​ເພີ່ນ​ເພື່ອ​ປັບປຸງ​ພັດທະນາ​ລະ​ບົດ​ການ​ເງິນ, ການ​ປີ​່ນປົວ, ການ​ຄຸ້ມ​ຄອງ​ການ​ເງິນ​ໂຮງໝໍ ຫັນ​ໃຫ້​ໂຮງໝໍ​ກຸ້ມ​ຕົນ​ເອງ​ທາງ​ດ້ານ​ການ​ເງິນ​ເທື່ອ​ລະ​ກ້າວ​ ແລະ​ ການຈັດ​ຕັ້ງປະຕິບັດ​ວຽກ​ງານ​ປະກັນ​ສຸຂະພາບ, ທົ່ວປວງຊົນ ເພື່ອຮັບປະກັນໃຫ້ປະຊາຊົນລາວ ໄດ້ຖືກປົກຄຸມດ້ວຍລະບົບການປະກັນສຸຂະພາບ, ທັບມ້າງອຸປະສັກດ້ານການເງິນ ໃນເວລາທີ່ເຂົາເຈັບປ່ວຍດ້ານສຸຂະພາບ.

 

ໂດຍມີກອງທຶນປະກັນສຸຂະພາບແຫ່ງຊາດເປັນຜູ້ຮັບພິຊອບຈ່າຍໃຫ້ສະຖານທີ່ບໍລິການປ່ຽນປົວ, ຮັບປະກັນຄຸນະພາບຂອງການປີ່ນປົວ, ແລະ ມີຄວາມຢືນຢົງທາງດ້ານການເງິນ, ນອກຈາກນັ້ນຝ່າຍລາວໄດ້ນຳພະຄະນະຜູ້ແທນໄປຢ້ຽມຢາມພົບປະກັບການນຳຂອງແຂວງວຽງຈັນ, ຢ້ຽມຢາມໂຮງໝໍ ແຂວງ ວຽງຈັນ ແລະ ທ່ຽວຊົມສະຖານທີ່ສຳຄັນ ແລະ ເດີນທາງກັບຄືນປະເທດໃນວັນທີ 26/09/2018.

  • 06 ມ.ຖ

 

​ ໃນ​ລະ​ຫວ່າງວັນ​ທີ 20 – 28 ພຶດ​ສະ​ພາ, 2019 ທ່ານ ຮ​ສ.ດຣ. ບຸນກອງ ສີ​ຫາ​ວົງ ລັດ​ຖະ​ມົນ​ຕີ​ກະ​ຊວງ​ສາ​ທາ​ລະ​ນະ​ສຸກ ໄດ້​ນຳ​ພາ​ຄະ​ນະ​ຜູ້​ແທນຂອງ​ລາວ ປະ​ກອບ​ດ້ວຍທ່ານ ​ຫົວ​ໜ້າ, ຮອງ​ຫົວ​ໜ້າ​ຫ້ອງ​ການ, ຫົວ​ໜ້າ​ກົມ​ອ້ອມ​ຂ້າງ​ກະ​ຊວງ, ວິ​ຊາ​ການ​ກ່ຽວ​ຂ້ອງ ແລະ ຄະ​ນະ​ສິນ​ລະ​ປະ​ຈາກ ກະ​ຊວງ​ຖະ​ແຫຼ່ງ​ຂ່າວ ວັດ​ທະ​ນະ​ທຳ ແລະ ທ່ອງ​ທຽວ ​ຈຳ​ນວນ​ໜຶ່ງ ໄປ​ເຂົ້າ​ຮ່ວມ ກອງ​ປະ​ຊຸມປະ​ຈຳ​ປີ​ ຂອງ​ສະ​ພາ​ອົງ​ການ​ອະ​ນາ​ໄມ​ໂລກ ເຊິ່ງ​ປີນີ້​ເປັນຄັ້ງ​ທີ 72 ​ຈັດ​ຂື້​ນ​ທີ່​ເມືອງເຊີ​ແນວ, ປະ​ເທດ ສະ​ວິດ​. ​ສະ​ພາອົງ​ການ​ອະ​ນາ​ໄມ​ໂລກ ໄດ້ມີ​​ການຈັດ​ກອງ​ປະ​ຊຸມ​ແຕ່​ລະ​ປີ ໂດຍ​ມີ​ຜູ້​ເຂົ້າ​ຮ່ວມ​ຂອງ ບັນ​ດາ​ປະ​ເທ​ດ​ສະ​ມາ​ຊິກຂອງ​ອົງ​ກາ​ນອະ​ນາ​ໄມ​ໂລກ, ບັນ​ດາ​ອົງ​ການ​ຈັດ​ຕັ້ງ​ສາ​ກົນ, ສະ​ຖາ​ບັນ​ການ​ເງິນ​ຕ່າງໆ​ເຂົ້າ​ຮ່ວມ. ສະ​ເພາະ ປີ 2019 ນີ້ ມີ​ບັນ​ດາ​ທ່ານ​ລັດ​ຖະ​ມົນ​ຕີ, ຮອງລັດ​ຖະ​ມົນ​ຕີ​ກະ​ຊວງ​ສາ​ທ​ລະ​ນະ​ສຸກ ພ້ອມ​ດ້ວຍ​ຄະ​ນະ​ຜູ້​ແທນ​ທີ່​ເປັນ​ສະ​ມາ​ຊິກ​ຂອງ​ອົງ​ການ​ອະ​ນາ​ໄມ​ໂລກ ຈາກ 197 ປະ​ເທດ, ຜູ້​ຕາງ​ໜ້າ​ຈາກຂອງ​ອົງ​ການ​ຈັດ​ຕັ້ງ​ສາ​ກົນ, ອົງ​ການ​ຈັດ​ຕັ້ງ​ທີ່ບໍ່​ຂື້​ນ​ກັບ​ລັດ​ຖະ​ບານ (INGOs, NGOs), ຜູ້​​ຕາງ​ໜ້າ​ຂອງ​ບັນ​ດາ​ສະ​ຖາ​ບັນ​ການ​ເງິນ​ຕ່າງໆເຂົ້າ​ຮ່ວ​ມ ເປັນ​ຈຳ​ນວນ ຫຼວງຫຼາຍ.

 

 

ພິ​ເສດ, ກອງ​ປະ​ຊຸມ ສະ​ພາອົງ​ການ​ອະ​ນາ​ໄມ​ໂລກ​ ຄັ້ງ​ທີ 72 ທີ່​ໄດ້​ຈັດ​ຂື້ນ​ແຕ່​ວັນ​ທີ 20-28 ພຶດ​ສະ​ພາ, 2019 ນີ້ ແມ່ນ​ໄດ້​ດຳ​ເນີນ​ໄປ​ດ້ວຍ​ດີ ແລະ ປະ​ສົບ​ຜົນ​ສຳ​ເລັດ​ຕາມ​ຈຸດ​ປະ​ສົງທຸກ​ປະ​ການຢ່າງ​ຈົບ​ງາມ ໂດຍພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ຮ​ສ.ດ​ຣ.ບຸນກອງ ສີ​ຫາ​ວົງ ລັດ​ຖະ​ມົນ​ຕີ​ກະ​ຊວງ​ສາ​ທາ​ລະ​ນະ​ສຸກ​ຂອງ ສ​ປ​ປ ​ລາວ. ປະ​ທານກອງ​ປະ​ຊຸມ ຂອງ​ສະ​ພາ ອົງ​ການ​ອະ​ນາ​ໄມ​ໂລກແຕ່​ລະ​ຄັ້ງ​ແມ່ນ​ໄດ້​​ຜັດປ່ຽນກັນຕາມພາກພື້ນຂອງອົງການອະນາໄມໂລກ ຊິ່ງ​ປີ 2019 ນີ້​ແມ່ນ​ຟຽນ​ຂອງ​​ບັນ​ດາ​ປະ​ເທດ​ໃນ​ຂົງ​ເຂດພາກພື້ນປາຊີຟິກຕາເວັນຕົກ. ເພື່ອ​ເຮັດ​ໜ້າ​ທີ່​ອັນ​ສຳ​ຄັນ​ນີ້ ທາງ​ຫ້ອງ​ການ​ຂອງ​ອົງ​ການ​ອະ​ນາ​ໄມ​ໂລກ ປະ​ຈຳ​ພາກພື້ນປາຊີຟິກຕາເວັນຕົກ ໄດ້​ຄັດ​ເລືອກ​ໃຫ້​ທ່ານ ຮ​ສ.ດ​ຣ. ບຸນກອງ ສີ​ຫາ​ວົງ ລັດ​ຖະ​ມົນ​ຕີ​ກະ​ຊວງ​ສາ​ທາ​ລະ​ນະ​ສຸກ​ຂອງ ສ​ປ​ປ​ລາວ ຮັບ​ໜ້າ​ທີ່​ເປັນ​ປະ​ທານກອງ​ປະ​ຊຸມ​ລະ​ດັບ​ສາ​ກົນ​ໃນ​ຄັ້ງ​ນີ້. ກອງ​ປະ​ຊຸມ ໄດ້​ສະຫຼຸບ-​ຕີ​ລາ​​ຄາ ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ສາ​ທາ​ລະ​ນະ​ສຸກ ໃນ​ທົ່ວ​ໂລກ​ ໃນ​ໄລ​ຍະ​ໜຶ່ງ​ປີ​ທີ່​ຜ່ານ​ມາ ໂດຍ​ສະ​ເພາະ ການ​ປ້ອງ​ກັນ, ຕ້ານ ແລະ ຄວບ​ຄຸມການ​ລະ​ບາດ​ຂອງ​ພະ​ຍາດ​ຕ່າງໆ ທັງ​ພະ​ຍາດ​ຕິດ​ຕໍ່, ພະ​ຍາດບໍ່​ຕິດ​ຕໍ່, ການ​ປ້ອງ​ກັນ ແ​ລະ ຕອບ​ໂຕ້​ໄພ​ຄຸ​ຄາມ​​ຈາກ​​ທຳ​ມະ​ຊາດ, ການ​ຊ່ວຍ​ເຫຼືອ​ຜູ້​ຖືກ​ກະ​ທົບ​ຈາກ​ຄວາມ​ຄັດ​ແຍ່ງ​ດ້ານ​ການ​ເມືອງ, ຈາກ​ສົງ​ຄາມ. ເປີດ​ເວ​ທີ​ສົນ​ທະ​ນາ, ແລກ​ປ່ຽນ​ບົດ​ຮຽນ​ການ​ປັບ​ປຸງ​ຄຸນ​ນະ​ພາບ​ຂອງ​ການ​ບໍ​ລິ​ການ, ການ​ພັດ​ທະ​ນາເຄື່ອງມື, ເຕັກນິກ, ເຕັກ​ໂນ​ໂລ​ຊີ​ທີ່​ທັນ​ສະ​ໄໝ່ ແລະ ກ້າວ​ໜ້າ ເຂົ້າ​ໃນ​ການ​ປ້ອງ​ກັນ​ພະ​ຍາດ ແລະ ປິ່ນ​ປົວ​ຄົນ​ເຈັບໃນ​ໄລ​ຍະຜ່ານ​ມາ ພ້ອມ​ທັງ​ວາງ​ທິດ​ທາງ ແຜນ​ການ ປີ 2019 – 2020 ເພື່ອ​ເປັນ​ບ່ອນ​ອີງ​ ​ໃຫ້​ແຕ່​ລະ​ປະ​ເທດ ແລະ ເຂດ​ແຄ້ວນ ນຳ​ໄປ​ປະ​ຕິ​ບັດ ເພື່ອ​ຮັບ​ປະ​ກັນ​ໃຫ້​ທຸກ​ຊັ້ນ​ຄົນ, ທຸກ​ເພດ, ທຸກ​ໄວ, ທຸກ​ເຊື້ອ​ຊາດ, ສາ​ສະ​ໜາ ທັງ​ຢູ່​ຕົວ​ເມືອງ ແລະ ຊົນ​ນະ​ບົດ ໄດ້​ເຂົ້າ​ເຖິງ​ການ​ບໍ​ລິ​ການ​ດ້ານ​ສາ​ທາ​ລະ​ນະ​ສຸກຢ່າງ​ເ​ທົ່າ​ທຽມ​ກັນ, ສະ​ເໝີ​ພາບ ແລະ ​ຍຸດ​ຕິ​ທຳ. ໃນ​ກອງ​ປະ​ຊຸມ, ຄະ​ນະ​ຜູ້​ແທນ​ລາວ ​ໄດ້​ຈັດ​ແບ່ງກັນ​ເຂົ້າ​ຮ່ວມກອງ​ປະ​ຊຸມ​ ແລະ ກິດ​ຈະ​ກຳ​ຕ່າງໆທີ່​ປິ່ນ​ອ້ອມ ​ເພື່ອ​ປຶກ​ສາ​ຫາ​ລື, ແລກ​ປ່ຽນ​ບົດ​ຮຽນ​ການ​ພັດ​ທະ​ນາ​ວຽກ​ງານ​ສາ​ທາ​ລະ​ນະ​ສຸກ​ຮ່ວມ​ກັບ​ປະ​ເທດ​ອື່ນ​ ພ້ອມ​ທັງ​ປະ​ກອບ​ຄວາມ​ເຫັນ​ຕ່າງໆ​ຢ່າງ​ມີ​ຄວາມ​ຮັບ​ຜິດ​ຊອບ ແລະ ເປັນ​ເຈົ້າ​ການ​ສູງ.

 

 

ໃນ​ວັນ​ທີ 20 ພຶດ​ສະ​ພາ ທີ່​ເປັນ​ມື້​ເປີດ​ຂອງກອງ​ປະ​ຊຸມ, ໄດ້​ມີ​ການ​ສະ​ແດງ​ບົດ​ຟ້ອນອວຍ​ພອນ​ສາວ​ລາວ​ລ້ານ​ຊ້າງ, ​ເປົ່າ​ແຄນ​ລາວ ແລະ ຟ້ອນ​ເຕີ້ຍ​ລ່ອງ​ຂອງ ຈາກ​ຄະ​ນະ​ສິນ​ລະ​ປະ ຂອງກະ​ຊວງ​ຖະ​ແຫຼ່ງ​ຂ່າວ ວັດ​ທະ​ນະ​ທຳ ແລະ ທ່ອງ​ທ່ຽວ ເພື່ອ​​ອວຍ​ພອນກອງ​ປະ​ຊຸມ ທັງ​ເປັ​ນ​ການ​ສະ​ແດງ​ສິນ​ລະ​ປະ, ວັດ​ທະ​ນະ​ທຳ, ວິ​ທີ​ດຳ​ລົງ​ຊີ​ວິດ, ມໍ​ລະ​ດົກ​ລາວທີ່​ໄດ້​ຮັບ​ເປັນ​ມໍ​ລະ​ດົກ​ໂລກ ແລະ ແຫຼ່ງ​ທ່ອງ​ທ່ຽວ​ທີ່​ສວຍ​ງາມ​ຂອງ​ຊາດ​ລາວ​ເຮົາ​ໃຫ້​ຊາວ​ໂລກ​ຮັບ​ຮູ້ ຊິ່ງ​ການ​ສະ​ແດງ​ດັ່ງ​ກ່າວ​ ໄດ້​ຮັບ​ຄວາມ​ສົນ​ໃຈ ແລະ ຍ້ອນ​ຍໍ​ຈາກ​ບັນ​ດາ​ທ່ານ​ທີ່​ເຂົ້າ​ຮ່ວມກອງ​ປະ​ຊຸມ​ເປັນ​ຢ່າງ​ດີ, ການ​ສະ​ແດງ​ຍັງ​ໄດ້​ຖ່າຍ​ທອດ​ສົດ​ອອກ​ທາງ​ອ່ອນ​ໄລ ໄປ​ທົ່ວ​ໂລກ ອັນ​ເປັນ​ການ​ສົ່ງ​ເສີມ​ການ​ທ່ອງ​ທ່ຽວ​ຂອງ​ລາວ​ນຳ​ອີກ​ດ້ວຍ. ສະຫຼຸບ​ແລ້ວ, ການ​ເຂົ້າ​ຮ່ວມ ແລະ ​ເປັນ​ປະ​ທານກອງ​ປະ​ຊຸມ ສະ​ພາ ອົງ​ການ​ອະ​ນາ​ໄມ​ໂລກ​ຄັ້ງ​ທີ 72 ຂອງ​ທ່ານ ຮ​ສ. ດ​ຣ. ບຸນກອງ ສີ​ຫາ​ວົງ ໃນ​ຄັ້ງ​ນີ້ ເປັນ​ການ​ຍົກ​ທ່າ​ນະ​ບົດ​ບາດ ແລະ ອິດ​ຕິ​ພົນ​ຂອງ​ຊາດ​ລາວ ໃນ​ເວ​ທີ​ສາ​ກົນ ເຮັດ​ໃຫ້​ຊາວ​ໂລກ​ຮັບ​ຮູ້​ຊາດ​ລາວຫຼາຍ​ຂື້ນ​ອີກ​ບາດ​ກ້າວ​ໜຶ່ງ

  • 16 ພ.ຈ

 

ໃນວັນທີ 15 ທັນວາ 2015 ທີ່ກະຊວງງສາທາລະນະສຸກ, ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໄດ້ຕ້ອນຮັບການເຂົ້າພົບປະ ຂອງທ່ານ ນາງ ລໍຣາທອມຊັນ ຮອງອຳນວຍການອົງການສາກົນ ເພື່ອການຍ້າຍຖິ່ນຖານ ທີ່ປະຈຳຢູ່ ສຳນັກງານໃຫ່ຍນະຄອນເຈນິວາ, ປະເທດສະວິດ , ເນື່ອງໃນໂອການທີ່ທ່ານເດີນທາງມາຢ້ຽມຍາມ ແລະ ເຮັດວຽກຢູ່ທີ່ ໃນລະຫວ່າງວັນທີ 15 ຫາ 18 ພະຈິກ 2018 ທີ່ນະຄອນຫຼວງວຽງຈັນ, ໃນນັ້ນ ມີທ່ານຫົວໜ້າຫ້ອງການກະຊວງສາທາລະນະສຸກ, ບັນດາທ່ານຫົວໜ້າກົມ, ຮອງກົມ, ຫົວໜ້າສູນ, ຮອງສູນ ແລະ ພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ

 

 

ໃນໂອກາດນີ້ທ່ານ ຮອງລັດຖະມົນຕີກະຊວງສາທາລະນະສຸກ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການມສຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຮອງອຳນວຍການໃນຄັ້ງນີ້,ພ້ອມນັ້ນທັງສອງຝ່າຍໄດ້ປຶກສາຫາລື ເຖິງນະໂຍບາຍດ້ານສາທາລະນະສຸກ ກ່ຽວກັບຄົນເຄື່ອນຍ້າຍຖິ່ນຖານ ເປັນຕົ້ນແມ່ນການເຂົ້າເຖິງການບໍລິການສາທາລະນະສຸກຂອງກຸ່ມຄົນດັ່ງກ່າວ, ວຽກງານການຕອຍໂຕໄພພິບັດ, ຄວບຄຸມພະຍາດຕິດຕໍ່ ແລະ ມາເລເລຍ, ປ້ອງກັນການຕິດເຊື້ອ HIV ແລະ ການປ້ອງກັນພະຍາດວັນນະໂລກ ທິ່ທັງສອງພາກສ່ວນຈະໄດ້ຈັດຕັ້ງປະຕິບັດຮ່ວມກັນໃນຕໍ່ໜ້າ.

 

 

ພ້ອມດຽວກັນນັ້ນ, ທ່ານ ຮອງລັດຖະມົນຕີກະຊວງສາທາລະນະສຸກ ຍັງໄດ້ສະແດງຄວາມຂອບອົກ ຂອບໃຈ ຕໍ່ສະໜັບສະໜູນ ແລະ ຊ່ວຍເຫຼືອເຂົ້າໃນຂົງເຂດວຽກງານຂອງຂະແໜງສາທາລະນະສຸກ ແລະ ກະຊວງສາທາລະນະສຸກຈະສຶບຕໍ່ໃຫ້ການຮ່ວມມືກັບອົງການດັ່ງກ່າວ ເປັນຢ່າງດີ, ທ້າຍສຸດທ່ານໄດ້ອວຍພອນໃຫ້ທ່ານຮອງອຳນວຍການອົງການສາກົນເພື່ອຍ້າຍຖິ່ນຖານ ຈົງປະສົບຜົນສຳເລັດ ໃນໄລຍະການທາຢ້ຽມຢາມ ແລະ ເຮັດວຽກຢູ່ທີ່ ສປປ ລາວ ໃຫ້ໄດ້ຮັບໝາກຜົນ ເປັນຢ່າງສູງ.