• 13 ສ.ຫ

 

 ໃນວັນທີ 9 ສິງຫາ 2019 ທ່ານ ຮສ. ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ຕາງໜ້າໃຫ້ກະຊວງສາທາລະນະສຸກ ແລະ ພະນັກງານແພດ ລຸ້ນທີ 10 ໄປມອບວັດຖຸປັດໃຈ ແລະ ເງິນສົດຈຳນວນໜຶ່ງ ຊ່ວຍເຫຼືອເມືອງນານທີ່ຖືກອຸບັດຕິໄພນ້ຳໄຫຼຊຸແຮງ

 

 

ໃນວັນທີ 30 ກໍລະກົດ ຜ່ານມານີ້, ເຄື່ອງຂອງທີ່ນຳມາມອບໃນຄັ້ງນີ້ລວມມີເງິນສົດ 10,300,000 ກີບ ແລະ ມີເຄື່ອງນຸ່ງຮົ່ມ, ເຄື່ອງນອນເດັກ, ອຸປະກອນການຮຽນຈຳນວນໜຶ່ງ ມູນຄ່າ 10,099,000 ກີບ ລວມມູນຄ່າທັງໝົດ 20,300,000 ກີບ.

 

 

 ເຄື່ອງ ແລະ ເງິນຈຳນວນດັ່ງກ່າວໄດ້ມອບໃຫ້ແກ່ ເຈົ້າເມືອງ ເມືອງນານ. ໂດຍຊ່ອງໜ້າພະແນກສາທາລະນະສຸກແຂວງ, ພະນັກງານຫຼັກແຫຼ່ງອ້ອມຂ້າງເມືອງນານ, ຫ້ອງການສາທາລະນະສຸກ ເມືອງນານ, ເພື່ອນຳໄປແກ້ໄຂບັນເທົາທຸກໃນເບື້ອງຕົ້ນ ແລະ ແຈກຢາຍໃຫ້ແກ່ພໍ່, ແມ່ປະຊາຊົນຜູ້ທີ່ຖືກເຄາະຮ້າຍຈາກອຸທົກກະໄພໃນຄັ້ງນີ້ ພາຍຫຼັງທີ່ໄດ້ມີການມອບຮັບແລ້ວ.

 

 

 ທ່ານຮອງລັດຖະມົນຕີ, ກະຊວງສາທາລະນະສຸກ ຍັງໄດ້ພົບປະ, ໂອ້ລົມກັບພະນັກງານຂອງຫ້ອງການສາທາລະນະສຸກເມືອງ ທີ່ກຳລັງປະຕິບັດໜ້າທີ່ ຢູ່ໂຮງໝໍຊຸມຊົນ ແລະ ສຸກສາລາ ຂອງເມືອງນານ.

 

 

ທ່ານໄດ້ໃຫ້ທິດຊີ້ນຳກ່ຽວກັບການເອົາໃຈໃສ່ ຕອບໂຕ້ພະຍາດລະບາດທີ່ອາດຈະເກີດຂຶ້ນ ພາຍຫຼັງນ້ຳໄຫຼຊຸໃນຄັ້ງນີ້ ຂໍໃຫ້ເອົາໃຈໃສ່ໃນການປັບປຸງວຽກງານສຸຂາອະນາໄມ ເປັນຕົ້ນ: ນ້ຳລີນ, ນ້ຳສ້າງ, ນ້ຳບາດານ ແລະ ວິດຖ່າຍ ທີ່ຖືກຜົນກະທົບໃນຄັ້ງນີ້ ເພື່ອຟື້ືນຟູກັບເຂົ້າສູ່ສະພາບປົກກະຕິໂດຍໄວ.